SQ Glockenthal

Zämä musige tüe mir Drei scho syt em ledige Alter. 1994 hei mir das Formatiöndli gründet u sythär schpile mir i dr glyche Bsetzig. Bi Uftritte u Feschtleni hei mir vili schöni Stunde erläbt u`nä Huufe Fründe u Kollegä g`lehrt kennä. Musikalisch pflegä mir houptsächlich dr Bärner-Stil. Kompositione us andere Landesgägende u Länder runde üses Repertoire ab.
Jahrelang sy mir üs einig gsy, dass mir ke Tonträger wei ufnäh mit luter Titlä wo scho x-mau verewiget si.
Wo aber nahdisnah di erschte Eigekompositione si derzue cho het me diskutiert, ob jitz ... oder glych nid, oder vilicht de später, u si ummi zum glyche Schluss cho wi vorhär. Ersch ir letschte Zyt si no äs paar schnittigi Föx derzue cho wo üs aune hei g`fauä u nach langem hin u här sy mir rätig worde „Jitz glych no … „ Für ne abwächsligsriiche Tonträger chönne z`produziere hei mir üser Fründe vom Jodlerquartett v. Gunten–Kunz aagfragt, ob Sie üsi Musig mit ihrem schöne Gsang wettä umrahme. Sie hei nid lang zögeret u zuegseit. Ihne säge mir: „Härzliche Dank für di Beriicherig ! Dir syt geili Sieche . . .

Di Produktion “Chilbi im Justistal“ widerspieglet o grad chly üsi Gschicht u das nid z`letscht wägem glychnamige Titu vom Ernst Krebs wo dr musikalisch Ziehvater vo Hansueli u Chrigu isch gsy.
Derzue chunnt, das mir alli uf di einti oder anderi Art, starch mit däm wunderschöne Fläckli Ärde verbunde sy.

Äbänäso isch o dr letscht Titu öppis speziells, wo Hansueli bereits im zarte Buebeauter vo sym Grosätti uf dr Dünzenegg het dörfe lehre. (Dr Komponischt isch üs leider unbekannt.)
Äso het o jede Titu vo de Eigekompositione syni eigeni Gschicht u das ganz im spezielle dr Fox „Richi Wipf“.
Leider isch är üs u synere Familie viu z`früech u unerwartet entrisse worde, was sich o im „Schlussteil“ vo däm Stück widerspieglet. Mir wärde ihn nie vergässe!

Mir wünsche öich viel G`fröits u gueti Underhaltig . . . . Öjier Gloggetaler